O‘zbekiston Xitoyga gumanitar yordam yuboradi
Koronavirus tarqalishiga qarshi kurashish yuzasidan O‘zbekiston Xitoyga insonparvarlik yordamini ko‘rsatadi. Prezident farmoyishiga ko‘ra 6 xil turdagi tibbiy buyumlar yuboriladi.
Xitoy Xalq Respublikasiga insonparvarlik yordamini yuborish to‘g‘risida Prezident farmoyishi qabul qilindi.
Farmoyishga ko‘ra, koronavirus tarqalishiga qarshi kurashish yuzasidan Xitoy tomonining sa’y-harakatlarini qo‘llab-quvvatlash maqsadida XXRga quyidagi tibbiy buyumlar shaklida insonparvarlik yordami yuboriladi:
- bir martalik steril tibbiy qo‘lqoplar;
- himoya qiluvchi kombinezon;
- yuz uchun filtrlovchi niqob;
- maxsus tibbiy forma;
- tibbiy niqoblar;
- tibbiy doka.
Yuklarni O‘zbekiston delegatsiyasi kuzatib boradi
Insonparvarlik yukini kuzatib borish va topshirish uchun XXRga sog‘liqni saqlash vazirining birinchi o‘rinbosari boshchiligida O‘zbekiston delegatsiyasi yuboriladi.
Favqulodda vaziyatlar vazirligi insonparvarlik yuki shakllantirilishi va yetkazib berilishi uchun mas’ul etib belgilandi.
Yordamning ikkinchi partiyasiga ham tayyorgarlik ko‘riladi
Insonparvarlik yordamining ikkinchi partiyasini tayyorlash maqsadida “O‘zto‘qimachiliksanoat” uyushmasi respublika to‘qimachilik korxonalarida tibbiy niqoblar va himoya kiyimlari tayyorlanishini ta’minlaydi.
