UzAuto Motors avtomobillar narxlari nima uchun ko‘tarilganligiga izoh berdi
UzAuto Motors kompaniyasi avtomobillar narxlarining ko‘tarilishini O‘zbekistonda soliqlarning ko‘tarilishi bilan izohladi. Shuningdek, 2019 yilda kompaniya 2,5 trln. so‘m soliq to‘lagan bo‘lsa, joriy yil uchun esa ushbu ko‘rsatkich 4,2 trln. so‘mni tashkil qilishi kutilmoqda, deyilgan xabarda.
UzAuto Motors kompaniyasi narxlarni qayta ko‘rib chiqish qarori narxlar kon’yunkturasi, shuningdek, ichki va tashqi bozordagi umumiy makroiqtisodiy vaziyatning o‘zgarishi bilan bog‘liq ekanligini ma’lum qilmoqda.
Ta’kidlanishicha, 2020 yilning 4 martiga qadar shartnoma imzolagan xaridorlar uchun barcha shartlar saqlab qolinadi.
"2017 yilning sentyabr oyida so‘ngi marta avtomobil narxlari o‘zgarganidan buyon dollarning so‘mga nisbatan ayriboshlash kursi o‘sdi, xom ashyo narxlari, kommunal xizmatlar tariflari, transport xizmatlari narxlari oshdi.
Bundan tashqari, avval soliq imtiyozlariga ega bo‘lgan UzAuto Motors kompaniyasi 2019 yilning oktyabr oyidan boshlab O‘zbekiston Respublikasining amaldagi qonunchiligiga muvofiq soliqlarni umumiy asoslarda, jumladan QQS bo‘yicha to‘lashni boshladi. 2019 yilda kompaniya 2,5 trln. so‘m soliq to‘lagan bo‘lsa, joriy yil uchun esa ushbu ko‘rsatkich 4,2 trln. so‘mni tashkil qilishi kutilmoqd a", deyiladi xabar.
Kompaniya matbuot xizmatining yozishicha, yaqin kelajakda iste’molchilar uchun avtokredit va muddatli to‘lov tizimlari ajratiladi. Ushbu yo‘nalishda kompaniya banklar bilan hamkorlikni yo‘lga qo‘ymoqchi.
