Hududlar toifasiga qarab avtomobillarning harakatlanishiga bo‘lgan cheklovlar olib tashlanadi
Respublika maxsus komissiyasining qaroriga ko‘ra, 18 maydan boshlab shaxsiy avtomobillarning harakati bo‘yicha cheklovlar bosqichma-bosqich bekor qilinadi.
Shaxsiy avtomobillarning harakati bo‘yicha cheklovlarni 2020 yil 18 maydan boshlab bosqichma-bosqich bekor qilish yuzasidan quyidagi tartib joriy etilmoqda:
“Yashil” toifadagi hududlarda:
- Respublika maxsus komissiyasi yig‘ilishining 2020 yil 6 maydagi 21-son bayoni bilan avtotransport vositalarining maxsus ruxsatnomasiz (stikersiz) harakatlanishiga ruxsat berilgan;
“Sariq” toifadagi hududlarda:
- soat 06.00dan – 22.00 ga qadar bo‘lgan vaqt oralig‘ida avtotransport vositalarining maxsus ruxsatnomasiz (stikersiz) harakatlanishiga ruxsat berilsin. Bunda avtotransport vositalarining salonida 4 kishidan ortiq bo‘lmasligi lozim;
“Qizil” toifadagi hududlarda:
- avtotransport vositalarining maxsus ruxsatnomasiz (stikersiz) harakatlanishiga faqatgina kunning muayyan vaqtida (07.00 dan – 10.00 gacha, 17.00 dan – 20.00 gacha) fuqarolarning ish joyiga borib-kelishi, tibbiy buyumlar, dori vositalari, oziq-ovqat va birinchi galdagi mahsulotlarni xarid qilish uchun harakatlanishiga ruxsat beriladi.
