Ўзбекистонлик 6 ёшли Муҳаммадюсуф Бутунроссия мусобақасида ғолиб бўлди
Ментал арифметика бўйича V Бутунроссия мусобақасида ўзбекистонлик Муҳаммадюсуф Анваров муносиб ўрин билан тақдирланди. У 4 ёшидан буён ментал арифметика билан шуғулланиб келади.
Москвада ўтказилган ментал арифметика бўйича V Бутунроссия мусобақасида Россия ва МДҲ давлатларидан келган 520 дан ортиқ 5-14 ёшдаги болалар ўзаро беллашди.
Россиянинг “UCMAS” – Болалар ментал арифметикаси маркази томонидан ташкил этилган мусобақа шартига кўра, иштирокчилар 8 дақиқа оралиғида 200 та арифметик топшириқни бажариш вазифаси берилди.
Ўзбекистонлик 6 ёшли Муҳаммадюсуф Анваров бу вақт оралиғида 120 та арифметик амалларни бажариб, 2-ўринни қўлга киритди.
"Муҳаммадюсуф 6 ёшда, ҳали мактабга бормаган. У математика билан 4 ёшидан буён шуғулланади. 2018, 2019 йилларда ҳам ушбу мусобақада иштирок этиб, олтин медаль билан тақдирланган эди", дейди Муҳаммадюсуфнинг онаси Нозима Анварова.
