Ўзбекистонда коронавирус юқтирганлар орасида 1 ёшгача бўлган болалар ҳам бор
Тошкент шаҳрида коронавирус билан касалланганларнинг 52 нафари уй бекаси, 20 нафари мактаб ўқувчиси.
17 апрель куни АОКА ҳузуридаги штабда Давлат Бош санитария врачи Баҳром Алматов иштирокида брифинг ўтказилди.
Брифингда коронавирус юқтирган беморлар ҳақида маълумотлар берилди.
Тошкент шаҳрида коронавирус билан касалланганларнинг:
- 52 нафари уй бекаси;
- 20 нафари мактаб ўқувчиси;
- 12 нафари уюшмаган ёшлар вакили;
- 20 нафари ишсиз.
"Коронавирус инфекциясининг тарқалиши беморлар қайд этилган муассасаларнинг жойлашувига, қолаверса, карантинда сақланаётган фуқароларнинг карантин маскани жойлашган манзилга ҳам бевосита боғлиқ.
Шунинг учун биз туманларда касалланганлар сони қайд этилишига қараб туриб, бизнинг туманимизда камроқ ёки бошқа туманда кўпроқ экан деган фикрга боришимиз керак эмас", деди Алматов.
Беморлар орасида 60 ёшдан катта ёшдагилар 32 нафарни, 50 ёшдан 60 ёшгача бўлганлар 28 нафарни, 30-39 ёшдагилар 82 нафарни, 20–29 ёшдагилар 88 нафарни ташкил қилади.
Шунингдек, беморларнинг 7 нафари 1 ёшгача, 3 нафари эса 1 ёшдан 2 ёшгача бўлган болалардир.
