23 мартдан бошлаб Ўзбекистонда тўй ва бошқа оммавий тадбирларни ўтказиш таъқиқланади
Ўзбекистонда коронавируснинг тарқалишини олдини олиш мақсадида тўй-ҳашамлар, оилавий тантаналар ва шунга ўхшаш оммавий тадбирларни ўтказиш таъқиқланади. Бундан ташқари бир қанча объектлар ва хизмат фаолиятлари тўхтатилади.
Коронавируснинг кириб келиши ва тарқалишини олдини олиш юзасидан чора-тадбирлар дастурини тайёрлаш бўйича республика махсус комиссиясининг навбатдаги мажлиси қарорига мувофиқ, барча ҳудудларда 21 мартдан бошлаб, бир қатор объектлар ва хизматлар фаолияти тўхтатилмоқда.
Ўзбекистонда 9 минг нафардан зиёд киши карантинга олинган
Хусусан:
- кўнгил очар объектлар (шу жумладан, тунги клублар, дискотека);
- спа ва массаж салонлар;
- чойхона ва ошхоналар (уйга элтиб бериш хизмати бундан мустасно);
- караоке, билярд заллари, чилим (кальян) марказлари;
- компьютер ўйинлари хизматини кўрсатувчи тадбиркорлик фаолияти турлари.
Шунингдек, 23 мартдан бошлаб, тўй-ҳашамлар, оилавий тантаналар, маърака ва маросим сингари оммавий тадбирлар ўтказилиши бекор қилинади. Ушбу маросимларни зарур бўлган тақдирдагина ихчам ҳолда, яқинлари билан бирга 10-15 киши иштирокида ўтказиш тавсия этилади.
