Қурол ишлаб чиқаришни лицензиялаш тартиби белгиланди

Фуқаровий ва хизмат қуролини ҳамда унинг ўқ-дориларини ишлаб чиқариш, таъмирлаш ва реализация қилиш бўйича фаолият фақат Ўзбекистон ҳудудида белгиланган тартибда рўйхатдан ўтган юридик шахслар томонидан амалга оширилади.

Бу ҳақда Ҳукуматнинг 2020 йил 11 мартдаги қарори билан “Фуқаровий ва хизмат қуролини ҳамда унинг ўқ-дориларини ишлаб чиқариш, таъмирлаш ва реализация қилиш бўйича фаолиятни лицензиялаш тартиби тўғрисида”ги низом тасдиқланди.

Низомга кўра: лицензияларни ёки уларга доир ҳуқуқларни бошқа шахсларга бериш тақиқланади.

Фуқаровий ва хизмат қуролини ҳамда унинг ўқ-дориларини ишлаб чиқариш, таъмирлаш ва реализация қилиш фаолиятини лицензиялаш Миллий гвардия томонидан амалга оширилади.

Бу бўйича фаолиятни амалга ошириш учун намунавий (оддий) лицензиялар берилади. Лицензия талабгорининг аризасига биноан лицензия лицензияланаётган фаолият турининг бутун фаолият турига ёки унинг бир қисмига (қисмларига) берилиши мумкин.

Лицензиялар амал қилиши чекланмаган муддатга берилади.

Лицензияловчи орган томонидан лицензия талабгорининг аризаси кўриб чиқилганлиги учун БҲМнинг 4 баравари (892 минг сўм) миқдорида йиғим ундирилади.

Лицензия берилганлиги учун БҲМнинг 10 баравари (2 млн 230 минг сўм) миқдорида давлат божи ундирилади.

Лицензия талаблари ва шартларига риоя этилиши устидан назорат лицензияловчи орган томонидан амалга оширилади.