Ўзбекистон Россияга энг йирик кўкат етказиб берувчи мамлакатга айланди

2019 йилда Ўзбекистон илк маротаба Россияга энг йирик кўкат етказиб берувчи мамлакатга айланди. East fruit таҳлилчилари маълумотларига кўра, жорий йилнинг дастлабки 8 ойи мобайнида ўтган йилнинг шу даврига нисбатан 19% кўпроқ маҳсулот етказиб бериб, сотув ҳажмини 12,9 минг тоннага етказди. Бу эса бозорнинг 40 % улуши демакдир. Шу билан бир қаторда ўзбек кўкатлари рақиблариникидан арзонроқ ҳисобланади.

Ҳисобот даврида Эрон умумий ҳисобда 11,2 млн. $лик маҳсулот экспорт қилган, бу ўтган йилга нисбатан 14%га кам демакдир. Ўзбекистон эса бу экспорт битимларидан 9 млн. $ ишлаб олган.

Аввалги йилларда бу бозорда Эрон етакчилик қилган. Россияга қўшни Грузиянинг экпорти 25% га камайган ва бозорга 1,8 минг тонна кўкат етказиб берган.

Ўзбекистонда маҳаллий экспортёрлар фермерлардан кўкатларни килограммига 30 цент (2840 сўм)дан маҳаллий валютада сотиб олмоқда. Агар яхши қаралса, бир гектар ердан 3000 – 9000 $ (28,4 млн. – 85,2 млн. сўм) фойда олиш мумкин.

Ўзбекистонда Грузияга нисбатан ишчи кучининг арзонлиги ҳам экспортёрларимизнинг Россияда биринчи рақам эгасига айланишларига сабаб бўлган.